The Volunteer Support Centre in Xewkija Gozo has been inaugurated following extensive renovation and modernisation of the building. This Voluntary Support Centre will serve as a one-stop-shop for Gozo, where Gozitan voluntary organisations will be served with up-to-date facilities and services. The center can be booked and used in the same way as the other centres in Valletta, Rabat and Birkirkara, Malta, through the use of the online calendar system at maltacvs.org. The centre is equipped with modern facilities including a conference room, meeting rooms and a garden.
Inawgurat ċentru tal-volontarjat f’Għawdex wara rinnovazzjoni estensiva tal-binja
Il-Ministru għal Għawdex u l-Ippjanar Clint Camilleri flimkien mal-Ministru għall-Inklużjoni u l-Volontarjat Julia Farrugia Portelli inawguraw il-proġett taċ-Ċentru tal-Volontarjat fix-Xewkija Għawdex. Dan wara investiment ta’ aktar minn €40,000 mill-Ministeru għal Għawdex u l-Ippjanar li ħa ħsieb ix-xogħlijiet estensivi ta’ mmodernizzar li saru f’din il-binja. Dan iċ-Ċentru tal-Volontarjat ser iservi ta’ one-stop-shop fejn l-għaqdiet volontarji Għawdxin ikunu moqdija b’faċilitajiet u riżorsi aġġornati. Fil-fatt, il-ftuħ tiegħu jimmarka t-tlestija ta’ miżura oħra tal-Budget ta’ din is-sena. Iċ-ċentru jista’ jintuża 24 siegħa kuljum b’sistema ta’ kalendarju u aċċess online li permezz tagħhom l-għaqdiet volontarji jistgħu jibbukkjaw l-użu tal-binja b’mod mill-aktar faċli. Fost l-oħrajn iċ-Ċentru huwa mgħammar b’faċilitajiet moderni li jinkludu conference room u ġnien għall-użu tal-għaqdiet.
Il-Ministru għal Għawdex u l-Ippjanar Clint Camilleri stqarr li f’dan iċ-ċentru saret rinnovazzjoni mill-ħaddiema tal-Gvern. Filwaqt li nirringrazzja lill-ħaddiema tax-xogħol li għamlu sabiex illum għandna dan iċ-ċentru modernizzat, issa l-għaqdiet volontarji Għawdxin għandhom diversi uffiċini u swali fejn jistgħu jaħdmu kif ukoll outdoor area. Għalhekk għandhom post komdu li jilqa’ l-esiġenzi tagħhom kif ukoll tal-pubbliku. Għaldaqstant, kompla jgħid li jħares ’il quddiem għal aktar xogħol b’mod speċjali fejn jidħol is-settur tal-volontarjat li huwa tant importanti għall-gżira Għawdxija.
Min-naħa tagħha, il-Ministru għall-Inklużjoni u l-Volontarjat Julia Farrugia Portelli tenniet l-impenn tal-Gvern li jkompli jestendi aktar għajnuna lill-għaqdiet volontarji, liema għajnuna tkun dejjem aktar aċċessibbli fil-komunitajiet tagħna. “Dan iċ-ċentru f’Għawdex issa jingħaqad maċ-ċentri l-oħra ta’ Malta biex joffri għajnuna lill-għaqdiet Għawdxin fl-operat ta’ kuljum tagħhom. “Bħala Gvern impenjati li nkomplu nagħmlu ħajjet l-għaqdiet volontarji tagħna dejjem aktar faċli, u l-ftuħ ta’ dan iċ-ċentru f’Għawdex se jagħmel proprju dan. Aħna nemmnu fl-importanza tal-volontarjat fis-soċjetà tagħna u se nkomplu nkunu ta’ spalla għall-għaqdiet li jagħmlu tant ġid fil-komunitajiet tagħna”, temmet tgħid il-ministru.
Preżenti għal din l-inawgurazzjoni kien hemm ukoll il-Kap Eżekuttiv tal-Kunsill Malti għas-Settur tal-Volontarjat Mauro Pace Parascandolo u d-Direttur tad-Diviżjoni tal-Operat fi ħdan il-Ministeru għal Għawdex u l-Ippjanar Joyce Farrugia. Il-Kap Eżekuttiv tal-Kunsill Malti għas-Settur tal-Volontarjat, Mauro Pace Parascandalo, qal li huwa inkoraġġanti li tara l-koperazzjoni kbira li kien hemm bejn Ministeri u entitajiet differenti, li lkoll għamlu l-almu tagħhom bit-tir li jkollna ċentru li jkun it-tieni dar għall-għaqdiet Għawdxin. “Inħares ’il quddiem li nara ħafna proġetti jinbtu u inizjattivi ġodda f’dan il-post bl-appoġġ kollu li hemm bżonn, għax b’hekk ikun ifisser li dan iċ-ċentru qiegħed jilħaq il-milja tiegħu”, temm jgħid is-Sur Pace Parascandolo.
Dan l-uffiċċju mhux biss ser iservi bħala binja għall-Kunsill Malti għas-Settur tal-Volontarjat, iżda ser jilqa’ fih l-operat tas-Servizzi Ewropej f’Malta (SEM) filwaqt li jintuża wkoll mill-għaqdiet irreġistrati bħala VOs fejn jistgħu jużaw dan l-ispazju biex jiltaqgħu u jorganizzaw l-attivitajiet tagħhom. Iċ-ċentru se jservi wkoll ta’ one-stop-shop ta’ għajnuna u appoġġ lill-voluntiera u għaqdiet volontarji Għawdxin. Dan se jikkumplimenta t-tliet ċentri li diġà jaħdmu b’dan il-mod f’Malta, li jinsabu fil-Belt, ir-Rabat u Birkirkara. Iċ-ċentru tax-Xewkija ġie rinnovat mill-ħaddiema tad-Diviżjoni tal-Operat fi ħdan il-Ministeru għal Għawdex u l-Ippjanar b’kollaborazzjoni mal-Kunsill Malti għas-Settur tal-Volontarjat fi ħdan il-Ministeru għall-Inklużjoni u l-Volontarjat.
